Cerpen Bali

PELIH JURUSAN

                                                                                                   

Remrem suryane kadi ngekoh masunar. Pasriok ujane buka tatangisan sane tan pegatang. “Yen kali kenken kaden aine lakar endag buin?”. Patakone buka ngutang-ngutang munyi dogen. Doh nyelusup ring angen, negak mapangsegang mabalih ujan. Makelo tan mareren, minab lakar sabeh ngantos peteng. Sledat-sledet paningalane tan ngidang nengil-nengil. Kenehe ngancan ngejoh-ngejohang, saget bengong suba di arep kacane nyablar.

Tolih-tolih lawate padidi, nginget-ngingetang dewek, buka merine nyiksikin bulu. Rasa makesieng deweke tatkala inget dugase enu masekolah. Uling cenik, nyumunin uling TK, SD, SMP, SMA ngantos kuliah. Rasa girang manahe tan kadi tatkala galahe nika. Kadiang tan ja wenten sane lakar dadi kapiambeng malih yen lakar nguberin ipiane.

Uling masan pis bolong empete. Kumpi, pekak lan dadonge konyang mabesen. Keto masi guru-gurune sami, sane kadi anak tua padidi. Sami mesenin “cening-cening, ragane sane kantun ngeranjing  lan jeg gantung ipiane tegeh-tegeh”. Dugase ento, saja ja anak gumine enu landuh, sami aluh. Konyang enu ngidang ngajak manyama. Apa buin dugase tiang enu cenik. Konyang anake ngidang saling tulung. Gumine jeg buka siki kaluarga, sami sagilik sagulung sabayan taka. Dugase ento enu bani ngorahang yening 98% kramane utawi jatmane kari nindihin dharma. Kari ngetohin sang sane patut. Ngudiang-ngudiang doen jeg aluh dugase ento. Apa buin ngalih geginan, jeg tamatan SMP dogen bisa ngidang dadi Guru. “Kenkenang men anak kuangan Guru je ipidanan, kikikikikik”. I Juling ngerikik kedek.

Apa buin anake di desa kene. Langah ane lakar nyak nyemak geginan lianan teken metani. Ulian hasil tanine joh luihang teken geginane sane tiosan.  Ene suba dadi ceciren gumine kari gemuh. Sabatek ada di gumine konyang lemuh, tusing ada ane kenyat.

Krodeg.., Krodeg.., krodeg (suaran jelanan I Juling, minab wenten sang sane rawuh).

“Bro..! ampakin jelane bro”. (I Muder nyeritin I Juling uling sisi).

“Adeng bos”. I Juling sambilang ngampakang jelanane.

Makesiab Juling ningalin Muder tatkala ngampakang jelanan. Cingakina I Muder mapangangge alus. Aken makemeja misi dasi. Buina masepatu chiko selem melengis. Keto masi tas ane katengteng, jeg aken sajan buka menejer gayane. Jeg top pokokne.

“Ais teka uling dija busan ne bos?” Mai mulian malu. Padalem panganggone kedas kadi baju baru.. hehehe”. Keto Juling nyapatin sane ajak ipun masekolah bareng uling cerik ngantos tamat kuliah.

“Apa bos? cara anak sing nawang kutun tanah dogen cai”. Muder nyautin sambilang ngalih tongos negak di jumahne Juling.

“Ae…., ban kene panganggone, kan sing cocok dadi kutun tanah biin, cocokne kan Bos, hehehe…”. keto Juling sambilanga makedekan ngajak Muder.

“Aduh…, jeg jelek ajan pajalane jani bro. Alen suba ujanan, misi sing lulus megae biin, inguh ake Ling”. Keto Muder nuturang dewekne sane wau pisan rawuh saking mawawancara (interview) saking sinunggil perusahaan sane nampek ring umahnyane.

“Tong mara teka uling pasiatan busane ne, keto…?’. Men di bagian apa ladne alih cai ditu?”. Keto Juling nyautin Muder.

“Bagian administrasi Ling”.

Bengong sambil makeneh I Juling ningehang sawut timpalne. Bih…, ene suba jeg dahat keweh sajan ngalih gaginan buka janine. Diapin tamat uling kuliah utawi seken dueg tur maprestasi ring sekolahan, tusing karuan masi maan gae disubane tamat. Jani asal suba ada bolong, jeg majurag nyeburin, diapin tusing adung ngajak jurusan sane jemak di sekolahan. Pang maan gen tis, apin tusing ja ento tatujone masekolah, jeg loboke dogen. Kewala anak dija-dija langite tegeh, keto masi dija-dija uyahe patuh pakeh. Apa dogen alih gaene jani anak patuh-patuh keweh. Keto Juling ngamimik di atinyane.

“Woe…, ngudiang bengong..?”. Muder saha nepak tundune Juling.

“Aah sing ada apa, Bos. Eh, yen pineh-pinehin, iraga jeg seken suba salah jurusan”.

Juling lan Muder kocap dumun masekolah sareng ngarereh kaguruan. Risampun tamat masekolah, ipun sareng kalih sampun polih ngenahang surat lamaran ring makuehin sekolah, sakewala anang siki tan wenten sane kagugu. Diapin ipun dueg-dueg, nanging yening nenten wenten sane ngarunguang, sakadi mangkine, jeg tan sampun sida lakar molihang pakaryan. Mula seken-seken krodit rumasayang sisteme sane mangkin.

“Nasib…, nasib…, apa ene mula tulis gidate ja, ooow?”.

“Aah.., santai dogen. Eda ento bas sanget pikira. Nyanan maimbuh pelutan lengar caine nyen, hahahahaha…”. Keto Muder nyautin I Juling sane mapangenan dewek.

Ngancan metengang suba, minab I Muder lakar nginep di jumahne Juling. Grapak-grapuk ipun itep ngorto sambilanga macanda nglipur lara ipun ring tengahin kenyat, sengit taler kewehnyane  pajalan idupe mangkin. Diapin sasai ipun ngutang-ngutang tindakan, kewala ipun tusing ja lakar makirig. Jalan terus, sapanuwuh nu ngidang nyingakin matanai.

(Puput)

 Nilai-nilai sane wenten ring sajeroning cerpen “Pelih Jurusan”

1.      Nilai agama (iraga dados jatma sumangdennya satata malaksana sane becik sareng samian jatma sane lianan, mangda satata asah, asih, lan asuh)

2.      Nilai pendidikan (iraga dados sisia mangda satata mapikenoh becik ring sajeroning ngrereh jurusan ring sekolah, sumangdennya tan wenten rasa nyesel ring dewek, tur sane paling penting mangda satata seleg malajah)

3.      Nilai sosial (iraga dados jatma mangda satata adung matimpal lan manyama, krana risampun adung matimpal utawi manyama sinah pacang nemu rahayu)

4.      Nilai ekonomi (iraga dados jatma ring sajeroning tamat masekolah utawi kuliah mangda prasida ngrereh gae, sumangdennya wenten bekel ring sajeroning iraga sampun tua lan dados jatma sane mandiri)