Cerpen Bali

Gaginan Dados Sisia

Das lemahe nuju rahina redite I Putu Sudarma sampun bangun, laut kenten ia ngencolang menain pesareane mangda bersih lan rapi. Usan menain pesarean I Putu Sudarma ngencolang ka kamar mandi pacang manjus. Men Suci lan Pan Anom pinaka meme muah bapannyane taler sampun bangun tur ragane makadua ulet makaria ring warung. Genah warung ipune becik pisan krana genahnyane ring sisi margine ageng. Punika awinan warung ipune satata akeh jadma sane mablanja. Langganan ipune akeh pisan, supir-supir, pegawai, guru, murid, muah sane lianan sami mararian mablanja irika.

Sane ngawinang warung ipune akeh sane mablanja, krana warung ipune sampun kasub pisan, genahnyane becik tur tis, lian ring punika ipun ajen pisan ring sajeroning wenten sane mablanja. Ajeng-ajengan sane kaadol sanget becik, jaan, miwah nenten maal. Punika mawinan akeh jadma sane mablanja ring warung ipune. Risjroning madolan, Men Suci sareng Pan Anom boya ja sareng makakalih manten, nanging ipun kawantu olih I Putu Sudarma. I Putu Sudarma pianak sane anteng, jemet, polos, ajen, tur jemet pisan mitulungin meme bapannyane tatkala madolan. Punika sane ngawinang meme miwah bapannyane sayang tur trena pesan sareng I Putu Sudarma. I Putu Sudarma mangkin kari kelas 4 SD, ring sakolah ipun sisia sane wikan, anteng, polos, tur ajen pesan sareng makasamian jadma sane wenten ring sakolah.

Gelisin carita sausan I Putu Sudarma manjus lan nganggen baju, ipun ngencolang ka warung pacang ngawantu meme bapannyane maadolan.

              “Meme, bapa ampura tiang ngaret rauh mariki, santukan tiang wau usan manjus.”

              “Inggih tu, tan napi! Mai opin malu meme mukak warunge.”

              “Inggih me, mangkin pun.” masaut I Putu Sudarma.

Ditu lantas I Putu Sudarma mukak warungne tur ngopin meme lan bapane maadolan. Warung ipune sampun rame antuk anak mablanja. Sepanan asane I Putu Sudarma ngayahin anake mablanja rame buka keto. Aget pisan meme lan bapannyne santukan I Putu Sudarma satata sadia ngopin ritatkala ipun tan ngeranjing ring sakolah.

Risedek galah 8 semeng, teka lantas Procot lan Kiul lakar ngajakin I Putu Sudarma malayangan ka carik.

“Me, bapa! I Putu Sudarma ada?”, Procot mataken.

“Ada cot, kenapa semeng-semeng suba malali?” masaut bapane.

              “Kene pa, tiang jak I Putu Sudarma suba majanji hari minggu lakar malayangan di carike.”

              “Oooh.. keto. Nah cot.”

Ditu lantas bapane ngencolang ngaokin I Putu Sudarma.

“Tu…. Aliha teken timpale, payu kone malayangan.?”

“Payu pa.” masaut I Putu Sudarma.

Sasampun Putu Sudarma ngawantu meme bapane maadolan, ditu lantas ipun mapamit teken meme lan bapane, krana ipun jagi malayangan sareng timpal-timpalne ring carik. Nangked ring carik ipun lantas ngrereh genah sane becik tur langsung menekang layangan sareng timpal-timpalne.

Ditu lantas I Putu Sudarma sareng timpal-timpalne saling korot layangan tur liang pesan kenehne ajaka makejang. Tan karasa galah sampun 5 sore, I Putu Sudarma ngaraos ajak timpal-timpalne lakar ngajakin mulih.

“Woooeee… timpal-timpal jak makejang, mai mulih ba nyak. Uba sore ne, apang sing weline jak meme bapa jumah, mani kaden ada ulangan, pang maan raga malajah jumah.”

“Beh gawat gen cai tu, prajani sok dadi penceramah, mai bin 1 jam gen malayangan, da ba malajah mani kanggoang nyontek gen, malajah sing malajah ujung-ujungne pas ngalih gae masi kar nombok, hahahahahaha”. Masaut I Kiul Sambilanga kedek ngakak.

“Ooooow tu beneh masi munyene I Kiul”. Keto masi pasautne Procot.

“Beh ne mara ja sing nawang apa dadi murid, kene nah Procot jak Kiul iraga dadi murid sapatutne kan malajah, yadiastun ada ulangan, sing ada ulangan tetep masi raga malajah, mani puane nak raga lakar ngaba jele melahe. Nah jani kadong raga nu kelas 4 SD, uli jani ba jemetang ane malajah apang sing biasa raga nyontek pas ulangan, ci ajak 2 kan ba nawang, nyontek to perbuatan ane jele, yen ba tawang jele ngudiang tetep laksanaang”. Keto I Putu Sudarma masaut ngemaang timpalne pitutur ane melah.

Masaut lantas I Kiul sambilanga masebeng maboya

“Hahahaha…. Bin tambah gawat cai tu, da mapitutur tua keto tu, encol nyaan ubanan cai. Jani kadong raga nu idup jani ba puas-puasang nyontek, pidan yen ba mati kar sing nyemak gae nyontek di suargan. Lagian yen nyontek to pasti nilaine gede, makane raga demen nyontek, sing cara cai sok gati dadi murid.

“Baaaaahhhh keweh ba men kene pemikirane, nah men keto ja keneh caine mani nyontek ba men ulangan tapi melahang tawanga ajak gurune, jani raga malunan ba mulih apang maan malajah jumah”. Keto pasautne Putu Sudarma sambilanga ngusud-ngusud tangkah.

“Hahahaha… nah tu, jemetang ba ane malajah, melaang gadang batun matan caine nolih buku, raga lakar malayangan malu bin jak Procot”. Keto pasautne  Kiul.

Kacrita buin manine ring galah 8 semeng, payu lantas gurune I Putu Sudarma ngalaksanayang ulangan ring kelas, ditu lantas Kiul lan Procot malaksana corah tatkala nyarengin ulangan. Ipun saling contek lantas ketara sareng gurune tur tan kaicen nyarengin ulangan. Disubane I Putu Sudarma usan ulangan, ipun lantas ka kantin jagi mablanja, nanging ring kantin ipun matepuk ngajak Kiul lan Procot, lantas ngaraos.

“Men engken Kiul ajak Procot, ba nyak gede maan ulangan?”.

“Beeeeh cai da nake ngawalek keto tu, apane gede, raga welina ajak gurune tu, elek raga mara keto ajak dadua nawang”. Keto pasautne Kiul.

“Nah ba tawang keto resiko nake nyontek, men mani-manian yen bin ada ulangan cai ajak dadua kar bin nyemak gae nyontek?”.

“Jani raga kapok ba nyontek tu, ternyata nyontek to perbuatan ane ngaranayang dewek padidi rugi, nah mani-manian yen ada ulangan raga kar malajah ba jumah tu”.

“Oooow tu, raga masi”. Keto masi pasautne Procot.

“Naaaaaa… yen kene mara timpal raga adane, inget nah yen mani-manian ada ulangan cai ajak dadua sing dadi bin nyontek”.

“Okeee pak bos, hahaha”. Keto pasautne Kiul ajaka Procot sambilanga kedek.

Gelisin carita munyi lantas bel sakolah nyiriang murid-muride jagi mawali ka umah soang-soang, ditu lantas I Putu Sudarma, Procot lan Kiul ngencolang ka kelas jagi ngambil tas tur laut budal.